Las vischnauncas dalla Ruinaulta
Cun la Ruinaulta cunfineschan nov vischnauncas idillicas. Vitgs rurals, cuntradas impressiunontas ed ina populaziun che appreziescha sia natira multifara. Ei vala buca mo la peina da visitar la Ruinaulta. Seschei era incantar dils vitgs circumdonts.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
Ilanz/Glion
Avon varga 700 onns ei la vischnaunca da Glion vegnida menziunada sco liug cun dretg da marcau: sco emprem marcau sper il Rein e sco «in liug circumdaus da mirs che attrai bia carstgauns che vulan viver leu». El fratemp ein ils mirs aviarts ed il marcau ei sereunius ensemen cun las fracziuns circumdontas alla nova vischnaunca dad Ilanz/Glion, «la porta alla Ruinaulta».
Laax
Il territori communal s’extenda dalla Val da Mulin tochen tier il spartauas dils cuolms grischuns e glarunes e tier igl imposant glatscher dil Vorab. Il Lag digl Oberst ed il Lag Grond fan medemamein part dil vitg. Purschidas culinaras e culturalas porschan l’Ustria Lags e la casa da cultura CULARTA.
Schluein
Schluein, in vitg romontsch, sesanfla egl ost da Glion e damaneivel dall’enconuschenta regiun da vacanzas Flem Laax Falera, all’entrada dalla Ruinaulta. Ina dallas pli bialas plazzas da golf dalla Svizra, la Buna Vista Golf Sagogn-Schluein, ei vegnida creada en accord cun la natira sin la planira sur la Ruinaulta e porscha ina grondiusa vesta sin la cuntrada muntagnarda dalla Surselva.
Stussavgia
Sin il territori communal cun ina surfatscha da 15’142 hectaras vivan pli pauc che 1000 habitontas e habitonts. Ella vischnaunca da Stussavgia inscuntreis Vus in mund per sesez. D’ina vart sesanfla cheu la Ruinaulta spectaculara cun sias preits sfendagliusas ed in bellezia flum che envida dad ir cun canu ni da far riverrafting. Da l’autra vart anfleis Vus ella vischnaunca da Stussavgia ina cuntrada culturala intacta ed ina cultura gualsra che vegn tgirada e vivida.
Sagogn
Il vitg da Sagogn ei situaus sin 800 m s.m. sur las cavorgias dil Rein Anteriur e seposa encunter las costas suleglivas da Laax e Falera. Grazia al clima migeivel san ins guder la stad seras emperneivlas sin las terrassas dallas ustrias da Sagogn. Ei vala la peina da visitar quei vitg ruasseivel che sesanfla damaneivel dils centers turistics ed ei tuttina lunsch naven dils traffic da transit. El vitg idillic vegn discurriu romontsch.
Tumein
Tumein sesanfla ver 10 km el vest da Cuera. Sut il grep dil casti da Rehanau s’uneschan il Rein Anteriur ed il Rein Posteriur. El vest dalla staziun da Rehanau-Tumein sesparta la lingia dalla Viafier retica da Cuera: ina lingia meina sur Tusaun ell’Engiadina e l’autra sur Mustér ad Andermatt.
Trin
A Trin anfleis Vus ruaus – ruaus dil mintgadi e dalla hectica d’ina gronda destinaziun turistica. Il bellezia panorama alpin, il tschiel blau marviglius, las numerusas uras da sulegl, igl Uaul Grond stgir-verd, il Lag la Cresta clars sco cristal, ils uals frestgentonts e las vastas pradas envidan da semiar e porschan pura recreaziun. La natira ei cheu inspirativa. Seschei era Vus inspirar dallas caussas dil mintgadi che fan smarvigliar.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
