Las orchideas indigenas
Las orchideas indigenas creschan en loghens fetg differents. Las inas han bugen terren humid, las autras terren schetg. Mo per tuttas vala il medem: ellas san mo sederasar, sche lur spazi da viver vegn buc engarschaus a moda intensiva. Per pruir ein tut las orchideas dependentas da bulius che creschan el terren (micorriza). Tochen ch’ils sems dallas orchideas ein madirs va ei tut tenor specia jamnas e meins. Sch’ils praus vegnan segai memia baul, san ils sems buca sederasar. Ins anfla els mo sin terrens cun paucas substanzias nutritivas. Avon ch’ina plonta giuvna flureschi l’emprema ga, vargan savens plirs onns. Las orchideas selvadias ein protegidas ed astgan buca vegnir rimnadas.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
Il calzer da Niessegner
Il calzer da Niessegner catscha ora plontas fermas che vegnan tochen 60 cm aultas e che stattan savens en gruppas. Naven da miez matg tochen miez zercladur glischan las flurs remarcablas els uauls da tieus e brutg. En sia trapla en fuorma da priel «peglia» el insects che fructificheschan la flur duront ch’els enqueran la sortida. Tochen ch’igl emprem fegl catscha ord in sem cuoza ei circa 4 onns. Tochen che l’emprema flur semuossa, sa ei cuzzar ver 16 onns.
La cefalantera cotschna
La cefalantera cotschna flurescha dall’entschatta zercladur tochen l’entschatta uost. Las plontas che vegnan 30 – 60 cm aultas catschan tochen quendisch flurs rosa en fuorma da péz. Era la cefalentera cotschna ha bugen ils uauls da tieus e da brutg clars e caulds dalla Ruinaulta. Igl ei ina dallas orchideas las pli derasadas ella Ruinaulta ed ins vesa ellas fetg bein naven dalla senda.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
La platantera bifeglia
Tgi che camina attentamein tras la Ruinaulta, sa scuvierer naven da miez matg tochen miez zercladur la platantera bifeglia fina. Las flurs alvas finas ein ordinadas a moda lucca per liung dil moni e carmalan cun lur odur las tschittas da notg per impollinar ellas. Las tschittas dalla notg han in tschitscher per puder tier il nectar ella sparunella da 2 cm lunghezia.
La listera ovala
La listera ovala nunpretensiusa e discreta crescha savens en gruppas. Pervia da sias flurs verdas fetg pintgas vegn ella savens survesida. Ella ha per regla exact dus fegls ovals cun aveinas marcantas tochen al péz dil fegl. La listera ovala ha bugen terrens humids e sederasa ella Ruinaulta savens els uauls da riva.
L’orchidea brina
Dil zercladur tochen igl uost fa l’orchidea brina cun sias flurs cotschnas sco puorpra parada sin las gondas suleglivas dalla Ruinaulta. Cun in tec cletg san ins scuvierer exemplars maiestus d’ina lunghezia da tochen 80 cm. Duront che l’orchidea crescha lai ella pender il péz dil portaflurs. Pér avon che flurir sedrezza il moni si e las flurs entscheivan a sesarver da sutensi.
Igl igniv d’utschi
Igl igniv d’utschi ei in parasit che senutrescha sulettamein d’in buliu (micorriza). Perquei drova el negina feglia ed ha tras quei era buca la cumparsa usitada d’ina orchidea. Siu num deriva da sias ragischs che catschan sut tiara en fuorma d’igniv. Igl igniv d’utschi sesenta il meglier en uauls da guilas e da feglia umbrivauns.
La mustgarella
Cun in egl scolau san ins anflar la mustgarella ch’ei savens mo 15 cm aulta. La mustgarella s’auda tier las flurs d’illusiun sexuala tipicas. Cun derasar in hormon sexual e far la pareta d’esser in insect feminin carmala ella las viaspras masculinas per l’impollinaziun. La plonta fina crescha denter la fin avrel e la fin fenadur.
