La bova da Flem – in eveniment da gronda dimensiun
Avon bunamein 10’000 onns ein varga 25 milliuns tonnas crap da caltschina sedistaccai sur Flem, denter il Crap da Flem ed il Péz Grisch. Els ein sballunai ver 1’000 meters ella profunditad ed han cuvretg la Val dil Rein Anteriur denter ils vitgs odierns da Castrisch e La Punt/Rehanau sin ina surfatscha da varga 50 km2 sut ina cozza da glera da plirs meters grossezia.
Ei dat differentas raschuns per quei eveniment catastrofal. Ina rolla han probablamein la tectonica e la cumposiziun dalla crappa giugau. Duront la formaziun dallas Alps ein singulas stresas da crappa stadas expostas a forzas enormas.
Ils facturs che han la finala caschunau la bova ein probablamein stai en emprema lingia la regressiun dils glatschers, l’erosiun dils funs dalla val e las cundiziuns climaticas semidadas.
Aschiditg ch’in glatscher emplenescha la val, tegn el ensemen las spundas. Ina spunda piarda denton cumpletamein igl equiliber, sch’il glatscher seretrai ed il funs dalla val erodescha il medem mument pervia dall’aua da neiv. La bova da Flem ei ida aval entgins mellis onns suenter la regressiun dil glatscher dil Rein e dil glatscher dil Segnas. Climaticamein ei quei temps staus exposts a grondas differenzas da temperatura la stad ed igl unviern e fasas cuortas freidas e humidas. Igl ei pusseivel che la schelira permanenta ei sgargliada ed ensemen cun precipitaziuns pli intensivas ha quei destabilisau ulteriuramein las spundas.
La bova da Flem ei stada la pli gronda bova dallas Alps dil temps postglazial. Il material da glera secumpona surtut da caltschina da Quinten. El cuntegn blocca da caltschina en tut las grondezias: da carpuns gronds sco casas tochen a crappa smardigliada a puorla.
Tras las immensas massas da crappa dalla bova da Flem ha il Rein Anteriur buca saviu cuorer vinavon pli el Lag Bodan ed ei s’accumulaus ad in lag. Igl aschinumnau Lag da Glion haveva ina lunghezia da ver 29 km ed ei semantenius sin il pli bia 100 onns. Suenter ha ei dau in’erupziun catastrofala dil lag. Ils fastitgs da quella san ins observar tras l’entira Val dil Rein tochen al Lag Bodan. L’erupziun dall’aua ha sfraccau era la siara dalla bova da Tumein. Quei ha danovamein reteniu il Rein sin in’altezia da ca. 820 m s.m. Quei lag ei semantenius ver 1000 onns. Siu rempar ei erodius tec a tec; il Rein ei semagliaus profundamein tras las massas dalla bova. Siu letg sesanfla oz sin ca. 620 m s.m. Aschia ha el creau la Ruinaulta cun sia cuntrada particulara.
Terraviva
