Ils reptils ed amfibis
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
La tschischeglia
Tschischeglias ein buca siarps, mobein saurs cun ina pial glischa squamada. Naven digl october tochen circa igl avrel seretrain las tschischeglias en lur zups per seproteger dalla schelira ed envernar. La stad san ins inscuntrar ellas alla catscha da schnecs e viarms sut aissas, feglia, crappa ni el mantun da cumpost.
Il luschard cun tachels
Ils luschards cun tachels s’audan tier las pli grondas specias da saurs dalla Svizra. Ils mascals han duront il temps da copulaziun la primavera costas e combas che tarlischan verd. Las femellas han adina ina colur da basa brina e mintgaton ina gula verd-melnauna. En cass da prighel san ils luschards fierer giu ina part dalla cua.
La siarp-veschla
La siarp-veschla ei buca da tissi ed ha pupillas rodundas ed in dessegn melnaun-ner tipic davos il tgau. Ferton ch’ils mascals ein mo circa 95 cm liungs, san las femellas haver ina lunghezia da tochen 130 cm. Las siarps-veschla han bia inimitgs ed ein perquei fetg spuretgas e fuin pervia dil minim disturbi. Ellas san senudar bein e scappan en cass da prighel savens era ell’aua e sfunsan.
La piertga
Il mars ein las piertgas els puozs e pultauns, nua ch’ellas secopuleschan e mettan l’ova sur pliras jamnas. Il zercladur bandunan ellas puspei l’aua. Lur pial semida ed ellas piardan las colurs tarlischontas. Ils animals che dattan ussa strusch en egl sezuppan sut lenna morta, aissas e crappa avon ch’els enqueran igl atun tard in zup per envernar.
La rauna da prada
Las raunas da prada ein, cuntrari da quei ch’ins manegia, buca verdas. Per regla ein ellas brinas, forsa ina gada in tec ulivas. Suenter igl unviern semettan las raunas da prada l’entschatta mars sin via per metter l’ova sper las auas. Ils mascals ein al liug avon che las femellas. Els serimnan en gruppas e lain resunar sco in chor in gurglem met duront las uras dalla sera.
Il rustg brin
Ils rustgs brins restan fetg fideivels a lur plaz da frega. Il quartier da stad, che sa esser tochen 3 km naven dall’aua nua ch’els mettan l’ova, bandunan els gia igl atun e van in toc en direcziun dil plaz da fregar, per ch’els stoppien la primavera ir mo pli in cuort tschancun. Duront il viadi seglian ils mascals bia pli pigns sin ils dos dallas femellas e selain purtar al plaz da fregar.
La natra neidia
La natra neidia ei la pli pintga siarp indigena (darar pli liunga che 70 cm). La colur da basa ei grischa, brina, tgietschen-brina ni melna sco arschella. Sin la vart sura porta ella in muster da puncts variabel. La siarp nunprigulusa che viva el zuppau survesan ins savens pervia da siu camuflagi. Cura ch’ella vegn disturbada semova ella per il solit buca. Cun in tec cletg san ins observar ella duront ch’ella stat a sulegl als urs dils trutgs schetgs e caulds cun bia structuras. Nossa suletta siarp strunglonta senutrescha per il pli dad auters reptils sco luschards, tschischeglias e perfin dad autras siarps.
